PARSADAAN POMPARAN NI RAJA NAPITUPULU
JAKARTA – BOGOR – DEPOK – TANGERANG – BEKASI
ANGGARAN RUMAH TANGGA
HATA PATUJOLO
Dipatomutomu do Anggaran Rumah Tangga on laho patoranghon, patangkashon naung tarsurat huhut manggohi angka na so disurat di Anggaran Dasar, alai ringkot tu panggulmiton ni Punguan. Ia Anggaran Rumah Tangga on sisada ihot jala na so boi sirangon dohot Anggaran Dasar.
Bindu 1
PUNGUAN
Dirajumi roha ni Ruas do ia na paojakhon Parsadaan Pomparan Raja ni Napitupulu Jabodetabek, sude Ruas do. Ala ni i, ingkon sude do Ruas padimundimun Punguan on asa marbungaran, boi mangulahon ulaon ni Punguan umbuk tu Anggaran Dasar dohot Anggaran Rumah Tangga, gabe las ni roha di sude Ruas.
Bindu 2
RUAS
- Ruas na Gok i ma Anak dohot Boru ni Ompu Raja Napitupulu naung hot ripe na maringanan di Luat Jakarta/Jabodetabek
- Ruas Naposobulung, i ma Doli-doli dohot Namarbaju pomparan ni Ompu Raja Napitupulu na maringanan di Luat Jakarta/Jabodetabek
Bindu 3
DALAN ASA GABE RUAS
a Naung hot Ripe, pasurathon dirina rap dohot donganna saripe (ripe dohot
ianakhon), marhite Surat naung pinarade ni Pangurus, dipasahat tu Pangurus ni
Wilayah manang Pangurus ni Punguan marompu-ompu, asa dipasahat muse tu
Pangurus Pusat.
b Naposobulung, pasurathon dirina marhite Surat naung pinarade ni Pangurus,
dipasahat tu Pangurus ni Wilayah manang Pangurus ni Punguan Marompuompu
asa dipasahat muse tu Pangurus Pusat.
Bindu 4
GABE NDANG RUAS
a Molo monding
b Ndang unduk tu Aturan ni Punguan
c Bungkas tu Luat na asing diduru ni Luat Jakarta/Jabodetabek
Bindu 5
PANGURUS
Laho manghobasi angka na ringkot tu panggulmiton ni Punguan dipillit jala dipaojak ma Pangurus.
- Penasehat, i ma angka natumua di umur manang natumua di Tarombo na rade rohana laho manuturi dohot maniroi Pangurus ni Punguan,. Naung hea Ketua Umum ni Punguan ndada sipilliton be. Disi sae periodena sian Ketua Umum ni Punguan pintor dohot do gabe Penasehat.
Ndang marperiode ianggo Penasehat. Alai molo ndang rade be rohana mangulahon ulaonna songon Penasehat, mansohot ma marhite haputusan ni Dewan Penasehat, jala dipabotohon tu Pangurus Harian. Pangurus Harian pe boi do mangusulhon asa unang gabe Penasehat be, ala ni na so hea parsidohot di ulaon ni Penasehat/Pangurus
- Ketua Umum, marsingkat sorin marudut ma sian Pomparan ni Ompu Raja Salinbabiat, Pomparan ni Ompu Raja Sipakko, Pomparan ni Ompu Raja Sieang, Pomparan ni Ompu Mulia Raja.
Ia na mamillit na naeng Ketua Umum i ma angka Natuatua sian pomparan ni Ompu i marhite-hite Pangurus Punguan ni Ompu i sandiri. Dung satolop, dipasahat ma tu Pengurus harian asa di ojakhon Dewan Penasehat. Molo ndang adong na rade rohana sian Pomparan ni Ompu na patut giliranna, dipasahat ma tu Pomparan ni Ompu na mangihut. Isarana, molo ndang adong na rade sian pomparan ni Ompu Raja Salinbabiat, dipasahat ma tu Pomparan ni Ompu Raja Sipakko. Songon i ma muse molo ndang adong na rade sian pomparan ni Ompu Raja Sipakko dipasahat tu pomparan ni Ompu Raja Sieang. Molo ndang adong na rade sian pomparan ni Ompu Raja Sieang, dipasahat tu pomparan ni Ompu Mulia Raja. Molo ndang adong na rade sian pomparan ni Ompu Mulia Raja, pinangido ma haradeon ni Pengurus Lama mangula saperiodenari manang paima adong na rade.
- Molo ndang boi mangula Ketua Umum ala ni halangan na totop isara ni; monding,marsahit,bungkas tu luat na asing, di pangido sandiri,tarurak, na mangganti ima Wakil Ketua Umum sian Ompu i.
- Sekretaris Umum dohot Bendahara Umum.
Ia na mamillit Sekretaris Umum dohot Bendahara Umum , i ma Ketua Umum naung tarpillit, nidonganan ni Pangurus Lama.
- Godang ni Pangurus dohot Rumangna saguru tu ringkotna.
- Periode ni Pangurus, 3 (tolu) taon.
- Na paojakhon Pangurus i ma Dewan Penasehat.
- Tingki paojakhon, saguru tu tingki na binuhul ni Pangurus Lama dohot Panguruna tarpillit.
Bindu 6
KEWAJIBAN NI PUNGUAN MARHITE PANGURUS
a. Manosoi angka pomparan ni Ompu Raja Napitupulu na maringanan di Luat
Jakarta/Jabodetabek na so Ruas ni Punguan dope, asa masuk gabe ruas
ni Punguan.
b Padimundimun Punguan asa tongtong jongjong, dibagasan hasadaon, renta jala
hobas mangula ulaon ni Punguan
- Mangantoi dohot patupahon na hasea di Ruas marhitehite paniroion dohot na
mangulahon Adat na ringkot di Ruas, di las ni roha manang arsak ni roha
- Patupahon pangurupion tu Ruas, saguru tu ringkotna, saguru tu partingkian jala saguru tu gogo ni Punguan.
- Patotahon dohot manotari angka Adat siulahononhon ni Ruas na umbuk tu na masa di Luat Jakarta/Jabodetabek, na so maralo tu sisiasia ni Adat Batak
- Manontuhon Aturan dohot Patik ni Punguan, jala paubahonsa saguru tu ringkotna, ala ni partingkian manang ala ni angka na masa
Bindu 7
HAK NI PUNGUAN MARHITE PANGURUS
a. Umboto namasa manang na naeng pamasaon di/ni Ruas marhitehite boa-boa sian Ruas, lumobi ma na marpardomuan tu Adat
- Mandohoti dohot mangaradoti Ulaon Adat na pinamasa ni Ruas
- Mambahen uso-uso manang sungkun-sungkun tu Ruas na so unduk tu Aturan
dohot Patik ni Punguan laho manangkasi hasisintong ni na masa gabe dalan laho
maniroi molo adong na so ture asa gabe denggan
- Mamangke arta/hepeng ni Punguan tu na ringkot ni Punguan, mangurupi Ruas, Ulaon sosial, umbuk tu Aturan ni Punguan
Bindu 8
KEWAJIBAN NI RUAS
a. Ingkon unduk tu Aturan ni Punguan
b. Mangulahon Aturan dohot Sangkap ni Punguan
c. Sian Hadirionna sandiri, parsidohot mangaradoti, padimundimun, pauliulihon, patotahon jala mangulahon Adat na masa di tongatonga ni Punguan
d. Manggarar Uang Pangkal, Uang iuran tu Punguan
e. Paboahon na masa di ibana tu Punguan marhite Pangurus:
1) Na sorang
2) Na naeng marbagas
3) Na monding
4) Na marbagas di Luat na asing
5) Munsat tu inganan na asing di luat Jakarta/Jabodetabek
6) Bungkas tu Luat na asing.
Bindu 9
HAK NI RUAS
a. Parsidohot di Rapot Ruas
b. Mangalehon hata dohot soara di pamilliton ni Pangurus
c. Dipillit gabe Pangurus
d. Manjalo panuturion dohot pangurupion di ulaon Adat dohot di angka na masa umbuk tu Aturani Punguan
Bindu 10
UANG PANGKAL DOHOT IURAN
a. Uang Pangkal Rp. 10.000.
b. Iuran Rp. 5.000./bulan
Bindu 11
PANGURUPION MARRUMANG HEPENG
a. Molo monding Ruas Ama manang Ina: Rp.300.000.-
b. Molo monding ianakhon ni Ruas: Rp.250.000.-
c. Tumpak tu Anak mangoli: Rp.250.000
d. Ulos tu Boru Muli Rp.250.000,-
e. Ulos tu Bere Mangoli/Ibebere muli Rp.250.000,-
f. Inteken leist sian Ruas na ro
Bindu 12
ATURAN PERALIHAN
Marpardomuan tu Bindu 5 PANGURUS ayat b, taringot singkat sorin ni Ketua Umum,. dung sidung periode ni Pangurus 2010-2013 na gabe Ketua Umum dipasahat ma tu pomparan ni Raja Salinbabiat , jala ihuthononton ma songon na tarsurat di Bindu
5 ayat b.
Bindu 13
PANGUJUNGI
a. Na so tarsurat di Anggaran Rumah Tangga on, hape ringkot tu panggulmiton ni Punguan na so maralo tu Aturan dohot Patik ni Punguan, diulahon Pangurus ma sian dos ni roha.
b. Asa marnidok Anggaran Rumah Tangga on ingkon diboto sude Ruas, jala diulahon dibagasan dos ni roha dohot dame.
c. Anggaran Rumah Tangga on sisada ihot do dohot Anggaran Dasar. Ditotophon dung jolo ditolopi Dewan Penasehat
PANGGOHI
Tuat si puti nangkok sideak
Ia i na ummuli i ma tapareak
Tiristiris ni langit panuangan ni simbora
Molo olo hita satahi sai tulus do sinangkap ni roha
Tubu ma dingindingin di Lumban Tongatonga
Sai saur ma hita madingin sai tulus sinangkap ni roha
Dipasupasu Amanta Debata
Ditotophon di Jakarta, Ari Rebo , 17 Maret Taon 2010